A i ka ardhur radha? Në “Anfield Road” shpresa që në majin e ardhshëm Liverpool mund të shpallet kampion i Anglisë është shtuar ndjeshëm, pas 29 viteve pritje.
Futbolli “heavy metal” i Klopp ka sjellë te “të kuqtë”, jo vetëm një lojë entuziaste, por edhe rezultatet e para: dy vende të katërta radhazi në kampionat dhe një finale e Champions League, ku u penguan vetëm nga gafat e portieri Karius.
Në këto kushte, Liverpool është kthyer një klub luksi dhe shumë premtues në futbollin europian.
Falë paràve të “Fenway Sports Group”, por edhe nga shitja e Coutinho për te Barcelona me 150 milionë euro, merkato e Liverpool ka qenë e nivelit më të lartë.
Mbrojtja u sistemua që gjatë dimrit të kaluar me blerjen e Van Dijk (për 80 milionë euro). “Të kuqtë” kanë marrë edhe dy mesfushorë Fabinho dhe Naby Keita, për të zëvendësuar Can dhe të dëmtuarin Oxlade-Chamberlain.
Klopp ka marrë edhe zviceranin me gjak shqiptar Xherdan Shaqiri, i cili do t’i japë frymëmarrje Salah ose Mane, kur të kenë nevojë për pushim.
Për më tepër, Liverpool ka zgjidhur edhe pikën e dobët, duke marrë portierin Alisson nga Roma për 75 milionë euro. Braziliani është bërë portieri më i shtrenjtë i historisë së futbollit.
Në shtatë muajt e fundit, Liverpool ka shpenzuar 300 milionë euro, me synimin për të ngushtuar diferencën prej 25 pikësh që pati me Manchester City në kampionatin e fundit.
Përgjigjet e para, në pritje të kampionatit që nis më 10 gusht, do t’i marrim në dy miqësoret ndaj Manchester City dhe Manchester United.