Leonardo nuk ka zbarkuar ende në “Casa Milan”, por tavolina e tij i ka tashmë disa çështje që presin të shqyrtohen. Duke i renditur alfabetikisht, më e rëndësishmja duket ajo e lidhur me dosjen “S”. “S” si shitjet apo sulmuesi, pak rëndësi ka radha, pasi të dyja duhen zgjidhur brenda 30 ditësh, e përpara se të nisë kampionati italian. Duke parathënë se shitjet u duhen arkave, teksa sulmuesi i nevojitet Milanit për të arritur rezultate, emri në këtë kuadër përflitet të jetë ai i Gonzalo Higuainit.
KONTAKT- Megjithëse Leonardo është larg Milanos, afrimi ndaj argjentinasit ka nisur nëpërmjet disa kontakteve paraprake me vëllain menaxher të futbollistit. Sulmuesi i Juves është një fiksim i vjetër i drejtuesit brazilian, teksa për cilësitë e tij shifrat flasin qartë.
Duke analizuar vetëm sezonin e fundit, Higuain ka shënuar 16 gola, më shumë se dyfishi i realizimeve nga Kaliniç e Andre Silva së bashku. Sipas informacioneve të para thuhet se Milani është gati t’i ofrojë “El Pipita”-s 4.5 milionë euro në sezon për katër vitet e ardhshme, ndërkohë që te Juvja ai arkëton aktualisht 7.5 në vit.
SHKALLË- Deri tani folëm për skenarë të përgjithshme të një akordi, i cili nuk mund të anashkalojë kontekstin ku drejtuesve të Milanit u duhet të lëvizin. Urdhri i UEFA-s ka qenë i qartë, bilancet nuk mund të jenë më negative në vitet që vijojnë.
Fondi “Elliot” mund të ndihmojë shëndoshjen e financave kuqezi, teksa edhe fitimet nuk duhet të mungojnë. Në të tilla kushte Milanit i duhet të shesë, për të siguruar më pas paratë për një si Higuain (Juvja kërkon të paktën 60 milionë euro).
PENGESA DHE ALTERNATIVA – Milani nuk ka mundësi ekonomike të shumta, teksa Leonardo ka edhe disa pengesa që duhet të kapërcejë. Çelsi i Roman Abramoviçit ka një mori sulmuesish, megjithatë duan të arrijnë gjithashtu tek “El Pipita”.
Dueli paraqitet i vështirë dhe kundër çekut londinez prej 9 milionë eurosh, mund të fitojë dëshira e lojtarit për të qëndruar në Itali. Në rast se Sarrit i plotësohet kërkesa për Gonzalon, atëherë Milani do të marrë kthesë drejt Moratës, me sulmuesin që është kontaktuar edhe një javë më parë.
