Josep Maria Bartomeu u paraqit para mbështetësve azulgrana në Kongresin e 39-të Botëror të Klubeve të FC Barcelona. Presidenti rishikoi sezonin e kaluar dhe foli për atë që do të vijë. Bartomeu kishte një kujtim për Sandro Rosell, në fillim të shfaqjes së tij. Presidenti i Barcelonës tha se Rosell është në “ndalim parandalues në një mënyrë të padrejtë” dhe kujtoi kontributin e tij në lëvizjen e mbështetësve. Ai, gjithashtu, falënderoi klubet satelite për mbështetjen e tyre në të gjithë botën, sepse “ato i ndihmojnë të fitojnë”.
Ndër të tjera, kreu i kampionëve të La Liga-s, nënvizoi: “Në të vërtetë jemi duke shikuar përpara, nga sezoni i ri, sepse na presin shumë sfida. Natyrisht, me këtë nuk dua të lë në hije atë që bëmë sezonin e kaluar. Kemi fituar në mënyrë të dyfishtë, titullin e shtatë të La Liga-s në dhjetë vitet e fundit. Kemi fituar Kupën dhe Superkupën e Spanjës, diçka që kurrë nuk e kishim bërë. Kjo tregon se jemi duke bërë mirë. Por, qasja jonë është rendja drejt përsosmërisë në rezultat dhe në lojë.
Iniesta? Ai e ka përfunduar misionin si futbollist i Barcelonës, por do të kthehet për të bërë detyra të tjera, për të cilat kemi folur tashmë. Admirimi për Iniesta nuk është vetëm i yni, por i gjithë botës së futbollit. Sezoni i ri? Ne duhet të synojmë për të fituar gjithçka. E kemi nisur me Superkupën. Kjo ishte një fitore e merituar ndaj një rivali me portencial të madh. Leo Messi u bë lojtari me më shumë tituj në historinë e Barçës (33 trofe).
Kapitenët? Të katër janë të stërvitur në “La Masia” dhe kjo është një veçori që vlen të theksohet. Ne jemi duke përfunduar një skuadër të shkëlqyer, me lojtarë me përvojë nga brenda dhe jashtë vendit. Ky model na ka sjellë sukses. Kemi përfshirë edhe të rinjtë si Lenglet, Arhtur apo Malcom, të cilët shumë shpejt do të përshtaten me mënyrën e lojës së këtij klubi. Dua të theksoj nënshkrimin e Vidal, i cili është një lojtar me përvojë, me cilësi dhe karakter, që do t’i japë ekuilibër ekipit.
Valverde? Dua t’i dërgoj një përqafim të madh. Ai ka ide shumë të qarta dhe është një menaxher i madh grupi, siç tregoi edhe vitin e kaluar. Jam shumë i ngazëllyer me punën e tij. Mendoj se kemi një të ardhme shumë të mirë me atë trajner, sepse i ka idetë shumë të qarta. Transferimet e kësaj vere? Merkato mbyllet më 31 gusht dhe do të mbetemi vigjilentë. Jemi të kënaqur me ardhjet dhe largimet. Grau, Segura dhe Abidal janë duke bërë një punë të mirë. Ata kanë mbështetjen tonë për të bërë atë që e përmirëson ekipin”.
