Keita Balde vrapon drejt Interit. Sulmue si senegalez i lindur në Spanjë ishte pranë zikaltërve edhe në sezonin e kaluar, por tashmë tratativa me klubin nga principata është në detajet e fundit.Pas sprintit të ndodhur ditën e martë, drejtuesit e Monakos, të cilët kishin pranuar ofertën e huazimit për një shifër të caktuar, me të drejtë blerjeje për 30 milionë euro në total, në verën e ardhshme, por nga dje ata kanë kërkuar që klubi italian ta huazojë futbollistin duke paguar të paktën një të tretën e shumës së përgjithshme, në mënyrë që verën e ardhshme të kenë më shumë garanci për shlyerjen e lojtarit.
Natyrisht që diferenca nuk është aq e madhe sa të “hedhë në erë” të gjithë tratativën, duke qenë se nga Franca përflitet se dje Interi pati ofruar 7 milionë euro për huazimin për një vit të Keitasë, ndërsa Monako kërkon që ta dërgojë këtë shifër të paktën në 10 milionë euro dhe në verën e vitit 2019 dhe për shlyerjen e mundshme më pas të mbeten vetëm 20 milionë të tjera. Për ish-sulmuesin e Lacios, duke parë pretendimet e fundit që ka ngritur Monako, Interi ishte përpjekur që të fuste në tratativë, vetëm për të mos paguar para të tjera, edhe kartonin e anësorit të djathtë, Antonio Kandreva, por ndërsa francezët e kanë pranuar si ide këtë fakt, ka qenë vetë futbollisti zikaltër ai që nuk ka dashur të lëvizë nga Milano dhe kaq ka mjaftuar që gjithçka të frenohet.
Fundja, lojtarët e tjerë si Zhoao Mario apo edhe Dalbert nuk i kanë pëlqyer bardhekuqve. Një tjetër ngërç minimal është edhe akordi me vetë Keita Balden mbi pagën e tij vjetore, duke qenë se menaxheri dhe vetë lojtari kërkojnë 4 milionë euro neto, ndërsa Interi për vitin e parë ofron vetëm 3 milionë euro neto, plus bonuse, në rast të kualifikimit të skuadrës në Ligën e Kampioneve. Gjithsesi, distancat mes ofertës dhe kërkesës nuk janë shumë të mëdha, ndaj sot pritet që të zgjidhet gjithçka mes Interit dhe Keitasë.