E mbylli sezonin te Benevento duke qenë një nga titullarët e padiskutuar, ndërsa sezoni i ri për Berat Gjimshitin duket paksa problematik, kjo lidhur për faktin se Atalanta nuk ka vendosur se çfarë do të bëjë me atë. Aktualisht Gjimshiti po stërvitet në Bergamo, ku trajneri Gasperini e ka menduar që ta ketë në skuadër duke qenë se nuk ka gjetur asnjë alternativë, por zëra të tjerë që qarkullojnë tregojnë se lojtari do të ndryshojë ambient.
Sipas një shkrimi të ditës së sotme të “La Gazzetta dello Sport”, bëhet me dije se mbrojtësi i Shqipërisë do të luajë këtë sezon në Serie A te Sampdoria. Ekipi nga Genoa e Italisë militon në Serie A, ndërsa ka objektiva madhorë këtë sezon. Mbetet vetëm që të ketë një marrëveshje mes klubeve që transferimi të mbyllet me sukses.
Atalanta e ka dhënë Gjimshitin në huazim për dy sezone, një vit në Serie B tek Avellino dhe një vit në Serie A te Benevento. Nuk dihet se dhe këtë herë do ta japë në formë huazimi, por gjasat janë që ta shesë te skuadrat që kanë shfaqur interes. Pak ditë më parë edhe Sassuolo hyri në garë për shërbimet e shtatlartit kuqezi, por që mësohet se është tërhequr pasi afroi Locatelli-n nga Milan-i.
