Trajneri i Bayern Mynih, Niko Kovac shpreson që mbrojtësi Jerome Boateng të mos largohet nga skuadra bavareze në merkaton e verës dhe të avzhdojë të luajë për kampionët e Bundesligës. Mbrojtësi 29-vjeçar ka ngjallur interesin e mjaft skuadrave të mëdha në Europë, me PSG që është në “pole” për ta marrë, por Kovac mund të ndalë këtë transferim. Trajneri i ka dhënë besim lojtarit, që u aktivizua 90 minuta në fitoren 1-0 që Bayern arriti në Kupën e Gjermanisë ndaj amatorëve të Drochtersen/Assel.
“Unë shpresoj që deri në fund të merkatos të mos ndodhë asgjë. Kjo do të më lumturonte, pasi do të mbaja në ekip të gjithë lojtarët. Unë besoj se Boateng do të jetë me ne në shtator, nuk ka për t’u larguar. Është një lojtar i rëndësishëm për ne, ka përvojë dhe është një lider”, u shpreh Niko Kovac, që beson te mbrojtësi i kombëtares gjermane. Kohët e fundit kanë qarkulluar zëra se pas 7 sezonesh, Boateng mund të largohet nga Bayern Mynih, por deri më tani nuk ka ardhur asnjë ofertë konkrete në adresë të mbrojtësit 29-vjeçar.
