Sulmuesi brazilian Danilo Alves është pranë rikthimit befasues në Superiore. Në mesin e muajit korrik 27-vjeçari firmosi për Afjet Afyonspor në Ligën 2 turke, duke u larguar nga Shqipëria pas 2 sezonesh e gjysmë aty.
Megjithatë, në Turqi përshtatja nuk ka qenë e thjeshtë dhe Danilo Alves ka luajtur vetëm 49 minuta deri tani, duke hasur jo pak probleme, ndryshe nga Renato Arapi, që është bërë menjëherë lojtar kyç në ekipin e tij të ri.
Për pasojë, ditët e fundit Danilo Alves ka biseduar me drejtuesit e Flamurtarit dhe nëse Afjet Afyonspor e lë të lirë, mund të kthehet në Vlorë, mësohet nga burime brenda klubit vlonjat.
Trajneri Ilir Daja është i shqetësuar, për faktin se situata e Elton Cale-së mbetet e bllokuar dhe duhet pritur gjyqi në FIFA, ndaj kërkon urgjentisht sulmues tjetër dhe Danilo Alves është lojtari i duhur, pasi e njeh shumë mirë ambientin në Vlorë.