Në Berlin zhvillohet më datat 6-12 gusht Kampionati Europian i Atletikës, ku do të marrë pjesë edhe vendi ynë me dy sportistët e tij më të mirë, Izmir Smajlaj në garën e kërcimit së gjati dhe Luiza Gega në garën e 3000 metrave me pengesa.
Nga dy sportistët kuqezinj pritet një rezultat i mirë në këtë Europian, duke parë paraqitjet e fundit, madje edhe zona e medaljeve është një mundësi reale si për Gegën ashtu dhe për Smajlaj. Atleti shkodran është i pari që do të garojë për Shqipërinë, në garën e kërcimit së gjati. Ai ndodhet në Baterinë A së bashku me 14 atletë të tjerë, ndërkohë që 15 atletë janë edhe në Baterinë B.
Ndërsa Luiza Gega do të garojë më datën 10 gusht në disiplinën e garës së 3000m/p, në bateritë eliminatore. Sportistët kanë mbërritur në Berlin dhe janë stërvitur rregullisht, me shpresën që të kalojnë pengesën e parë, kualifikueset dhe më parë të synojnë për medalje.
