Trajneri i Skënderbeut, Orges Shehi, është i drejtpërdrejtë kur shprehet se fitorja për skuadrën që ai drejton është detyrim, pavarësisht ekipit që ka përballë. Një ditë para premierës së këtij edicioni të Superiores, ish-portieri i kampionëve e pranon se nuk do të ketë shumë ndryshime krahasuar me formacionin që hodhi në fushë në Superkupën e Shqipërisë.
Formacionin ende nuk e kemi zbardhur, por sigurisht që do të bazohemi tek lojtarët që luajtën para një jave. Është një përballje mes rivalëve, që e luajmë në shtëpinë tonë përballë tifozëve tanë dhe e kemi detyrim që ta fitojmë.
I pyetur se ku i sheh pikat e forta te Skënderbeu, për të besuar se mund ta fitojë sërish titullin, Shehi u përgjigj:
“E kemi patur mendjen të kampionati, por kemi vëzhguar me kujdes edhe disa prurje të reja, për të cilat do të vendosim shumë shpejt. Pikat e forta të Skënderbeut i shoh kudo, por le t’ia lëmë kohës për t’i treguar. Gjithsesi mund të veçoj mentalitetin e të punuarit, të qenit grup dhe faktit që kemi lojtarëve përvojë që edhe pse kanë fituar shumë trofe kanë ende shumë uri për të fituar.”
