Jan Oblak e ka nisur sezonin në të njëjtën mënyrë si e mbylli sezonin e kaluar. Me pritjet e tij ai i dha fitoren skuadrës së Diego Simone, në javën e kaluar ndaj Rayo Vallecano dhe e shpëtoi nga humbja në ndeshjen e parë të kampionatit në fushën e Valencia.
Gjithsesi, slloveni mendon se Atletico nuk e ka vlerësuar aq sa duhet me ofertën për kontratën e re dhe nuk ka ndërmend ta rinovojë atë. Në shkurtin e kaluar ai rinovoi deri në vitin 2020, duke e çuar klauzolën për prishjen e saj nga 45 në 100 milionë euro.
Gjatë verës, Liverpool dhe Chelsea kërkuan shërbimet e tij, por portieri i shprehu besnikëri Atletico duke refuzuar mundësinë për të shkuar në Premier League, ku zbarkuan Alisson dhe Kepa, që me 75 dhe 80 milionë euro u bënë automatikisht portierët më të shtrenjtë të historisë së futbollit.
Oblak nuk e pëlqeu shifrën financiare të ofruar nga Atletico, për rinovimin deri në vitin 2023, kësisoj 25-vjeçari ka nisur të mendojë largimin verën e ardhshme, me Paris Saint-Germain që është gati t’i ofrojë vendin e pasardhësit të Buffon.
