Një kamerunas për Skënderbeun. Një lojtar, i cili mund të shërbejë si alternativë për trajnerin Orges Shehi. Miqësorja e korçarëve me Besën u ndoq në tribunë nga një vëzhgues special.
Janik Makota, qendër-sulmues, i cili mund të luajë edhe si sulmues i dytë. Lojtari ka zbarkuar në Korçë dhe këtë të diel nis provën te Skënderbeu. 26-vjeçari është rritur si lojtar te ekipi i dytë i Nansit. Më pas një aventurë në Ligën e Dytë portugeze me Sporting Kovila dhe prej aty, vetëm rënie.
Në Kamerun, ku ka qenë pjesë e përfaqësueses së 20-vjeçarëve, cilësohej si një lojtar i perspektivës, por asgjë nuk shkoi sipas parashikimeve. Në tre sezonet e fundit Janik Makota ka luajtur në ligat e ulëta franceze, më specifikisht në kategorinë e katërt.
Skënderbeu mund të jetë “piaca” e duhur për t’u rikthyer për sulmuesin, i cili mbeti një talent në tentativë. Nga ana e tyre, nëse binden nga prova, korçarët mund të gjejnë një lojtar interesant për sezonin e ri.
Marrëveshja mund të realizohet, sepse 26-vjeçari nuk ka kërkesa të tepruara financiare. Problem mund të paraqesë vetëm një dëmtim i pësuar në fillim të vitit, i cili e la jashtë për rreth 2 muaj jashtë fushave.
