E pabesueshme, por e vërtetë! Tashmë është e kryer, Erald Çinari është futbollisti më i ri i skuadrës së Partizanit. Mësohet se mesfushori me tipare të avancuara ka gjetur akordin me skuadrën kryeqytetase.
Çinari u rikthye nga Kroacia pas problemeve që kishte me dokumentacionet dhe tashmë ka vendosur të rinisë karrierën me skuadrën e “demave”. Lojtari ka gjetur gjuhën e përbashkët me drejtuesit e kuq dhe do të vihet shumë shpejt nën urdhrat e trajnerit Skënder Gega.
Ai do të kalojë te Partizani deri në momentin që të zgjidhet situata ndërmjet Alaves-it dhe Vllaznisë. Klubi kuqeblu dhe spanjollët do të përballen në FIFA. I riu do të luajë për Partizanin.
Kryeqytetasit i kanë premtuar se nuk do t’i krijojnë probleme në rast se i krijohet mundësia për të kaluar tek ekipi spanjoll. Nga ana tjetër, kalimi te 15 herë kampionët e vendit i bën mirë dhe lojtarit, pasi do të gjejë formën dhe do të marrë minutat e duhura. Partizani fitoi garën me Laçin, pasi presidenti Pashk Laska kishte nisur kontaktet me lojtarin.
