Një penallti e ekzekutuar nga James Milner dhe një gol i Manèsë në kohën shtesë, i kanë mjaftuar Liverpoolit për të marrë fitoren e dytë në po kaq ndeshje të sezonit të ri në Premier League.
Edhe pse ndaj një rivali modest si Crystal Palace, “të kuqtë” janë gjendur përballë vështirësive dhe u desh një ndërhyrje e gabuar në zonën e rreptësisë kundrejt sulmuesit më të dalluar, Mohamed Salah, që të fitohej e drejta e goditjes së 11-metërshit në minutën e 45-të dhe të fundit të pjesës së parë.
Në pjesën e dytë, ndonëse vendasit mbetën në inferioritet numerik, si pasojë e daljes me karton të kuq të mbrojtësit të djathtë, Wan-Bissaka, u desh vetëm minuta e 3-të shtesë që “të kuqtë” të shënonin sërish për të vulosur fatet e takimit me rezultatin 2-0, falë golit të Sadio Mane.
Liverpooli tashmë gjendet mes 6 ekipeve me pikë të plota pas dy javëve, mes të cilëve kampionët e Manchester Cityt, Chelsea dhe Tottenham.
