Pas marrjes së çmimit si “mbrojtësi më i mirë” i sezonit 2017/18, Sergio Ramos ka folur përpara mediave për trofeun e fituar, marrëdhënien me Salah dhe vendimin e organizatorëve të UEFA për ta ulur vetëm një karrige pas tij, por gjithashtu edhe për mungesën e ish- shokut të skuadrës, Cristiano Ronaldo.
Çmimi: “Një natë e veçantë, një mbrëmje gala që gjithmonë është shumë e rëndësishme për futbollistët. Reali Madrid ka treguar edhe një herë se është i kompletuar në të gjitha aspektet. Keylor, Modric, Cristiano kur ishte tek ne…është një tregues që ata po i bëjnë gjërat siç duhet duke shkruar historinë, por në futboll nuk mund të jetohet me të kaluarën, kështu që ne kemi filluar sezoni nga e para, me të njëjtën ambicie “.
Salah: “Ishte diçka qesharake ajo që ndodhi sot. Ai u kthye, unë e përshëndeta dhe kaq”.
Mungesa e Cristiano-s: “Ne nuk dinim asgjë. U befasuam kur na thanë që nuk do vinte. Është vendimi i tij, është i lirë të bëjë atë që dëshiron. Nuk kam biseduar me të, do të ketë arsyet e tij, është një pyetje për të. Nuk mendoj se Cris nuk është i lumtur që çmimin “lojtari më i mirë” e fitoi Modriç. Ai mund të mërzitet që nuk e fitoi ai, por jo për faktin se e fitoi një shok i skuadrës, dyshoj. Nëse ka një lojtar që e ka merituar ta fitojë këtë çmim është padyshim Modriç. Nuk e di nëse nuk ka ardhur se e dinte që s’do e fitonte…është një pyetje për të”.
