Nuk ka përfunduar ende ndjekja e një sulmuesi në shtëpinë e Realit të Madridit. Sipas asaj që raporton “Marca”, mes objektivave kryesore të “Los Blancos” është Rodrigo Moreno Maçado, i njohur thjesht si Rodrigo, por Valencia ka ngritur një mur të lartë për sulmuesin brazilian (i natyralizuar si spanjoll).
Mes të dyja klubeve ka pasur kontakte të ndryshme, por përgjigjja që ka ardhur nga “Mestalla” ka qenë shumë e qartë: “Ose paguani klauzolën e prishjes së kontratës së sulmuesit (120 milionë euro) ose nuk ka asnjë marrëveshje”. Dhe me këto kushte është e vështirë që ky operacion të shndërrohet në një pistë të nxehtë në ditët e ardhshme të merkatos.
