Në qytetin e Xhenovës po zhvillohet funerali shtetëror i viktimave të tragjedisë që ndodhi pak ditë më parë, kur një urë u shemb në qytetin që ndodhet në zonën e Liguria dhe i mori jetën 38 njerëzve. Pas kërkesës që patën bërë dy ekipet e këtij qyteti, Federata Italiane e Futbollit (FIGC) vendosi që ndeshjet e Sampdorias (ndaj Fiorentinës) dhe Genoas (ndaj Milanit) të mos luhen këtë fundjavë, por të shtyhen për një periudhë tjetër.
Por e veçanta është se sot, gjatë funeralit të viktimave, të pranishëm kanë qenë edhe futbollistët e të dy skuadrave të Xhenovës. Ata kanë mbërritur së bashku në kishën ku po zhvillohej ceremonia, të shoqëruar nga stafet përkatëse si dhe presidentët e dy klubeve, Massimo Ferrero (Sampdoria) dhe Enrico Preziosi (Genoa). Një shenjë solidariteti që tregon se i gjithë qyteti, edhe dy ekipe rivale të tij, bashkohen në një moment tragjik që po kalon Xhenova.