Kur një ekip humbet, gjithmonë kërkohet të kuptohet se çfarë nuk shkoi në mënyrën e duhur. Humbja me Kamzën ditën e shtunë e ka shtyrë teknikun Ze Maria të mbledhë skuadrën për të diskutuar për gabimet dhe moralin e ekipit.
Braziliani ka këmbëngulur që lojtarët të shmangin ngërçin psikologjik në të cilin kanë rënë dhe të kërkojnë më tepër besim te vetja. Në lidhje me zgjedhjet e bëra për takimin e parë të këtij sezoni në Superligë trajneri i bardhebluve nuk sheh gabime, por u është drejtuar futbollistëve që të luftojnë vetëm për fitore në dy takimet e ardhshme të kampionatit.
