Sonte është mbrëmja gala e FIFA-s ku yjet e fushës së blertë kanë zhveshur fanellat për të veshur kostumet. Tashmë që të gjithë emrat e mëdhejnë kanë mbërritur në tapetin e kuq të Londrës, cili mendoni se e ka marrë më seriozisht eventin?
Mesa duket Luka Modric ia ka taksur vetes çmimin e lojtarit më të mirë, pasi është veshur shumë klas, por ka dashur të përfshijë një element ballkanas dhe ka shtuar një spilë ndoshta dhe të panevojshme. Ai ka qenë i shoqëruar me bashkëshorten dhe dy fëmijët e tij.
Salah ka zgjedhur të jetë totalisht “chic” me look-un plotësisht të zi.
Dani Alves ka guxuar më shumë duke veshur një xhaketë me gurë ndërsa ka përdorur varësen e gjatë si aksesor plotësues.
A do kishte kuptim që Gareth Southgate të hiqte dorë nga jeleku i tij? Jo. Shumë klasik por shamia bordo i ka dhënë një finesë tjetër këtë herë.
Eden Hazard ka “thyer” akullin e ngjyrës së zezë teksa ka veshur një kostum ngjyrë vishnje. Një gjë është e sigurt, ka rënë në sy.
Marcelo me familjen duken për mrekulli. Ka zgjedhur një kostum blu të kombinuar me atlete të bardha. Por për zgjedhjet e Marcelos nuk duhet të kemi dyshime, mjafton të shikojmë gruan e tij për të kuptuar që ka shije.
Ramos, keq na vjen, po me këtë bukuri që ke në krah zor se e ka mendjen njeri tek ti. Gjithsesi, e bardha i shkon yllit të Real-it.
Ronaldinho, përfundimisht është një njeri që ka stilin e tij, mendoj se ose do e dashurojnë ose do e urrejnë këtë look. Po kapelja si ju duket?
Legjenda Ronaldo ka dhënë një buzëqeshje të shtirur para aparateve, por veshja klasike, jo se do na ngelë në mendje…
Courtois, është portieri më i mirë, nuk ka guxuar shumë dhe mirë ka bërë, por s’ka faj që nuk ka një raport të mirë me aparatet.
