Ishte dëshira më e madhe e tifozërisë zikaltër, ëndërr e ndaluar, dhe, me sa duket, e tillë do të mbetet edhe ne të ardhmen. Luca Modric, i cili sapo fitoi çmimin e lojtarit më të mirë të vitit atribuar nga FIFA, pohoi se në sesionin e fundit të merkatos, atë të verës, nuk kishte aspak qëllim pë t’u larguar nga organika e “Los Blancos”, sikundër ishin aludimet mediatike.
“Nuk e kam parë kurrë veten jashtë organikës së Realit,” – deklaroi mesfushori kroat, që shuan kështu edhe shkëndijën e fundit të shpresës për tifozërinë e klubit nga Milano. Gjithsesi, interistët janë mësuar të mos dorëzohen dhe gjejnë një dritare të re shprese, pasi Modric foli edhe për të ardhmen e dëshirat e tij.
“Do të më pëlqente ta mbyllja karrierën me fanellën e bardhë, por të ardhmes asnjëherë nuk i dihet, ndaj le të shohim se çfarë do të ndodhë,” – vijoi 33-vjeçari kroat.
Numri 10 i klubit mbretëror ka një kontratë e cila skadon në qershor të vitit 2020, ku përfshihet edhe një klauzolë largimi prej 750 milionë eurosh, por gjithsesi, rinovimi i tij nuk ka ndodhur ende. Referuar fjalëve të presidentit Florentino Perez, i cili disa ditë më parë u shpreh se edhe në rastin e Cristiano Rondalos nuk ishte vetëm tratativa ajo që bëri të mundur largimin e “yllit” portugez nga “Santiago Bernabeu”, por vetë dëshira e sulmuesit, për zikaltrit shpresa vdes e fundit, pasi ata besojnë se një ditë Modric mund të dëshirojë vërtet transferimin në Milano.
