Barcelona ka planifikuar të ndjekë “yllin” e Manchester United, Paul Pogba, në të gjitha ndeshjet e këtij sezoni, sipas asaj që bën të ditur shtypi britanik. Pogba ishte në “radarin” e klubit të La Liga gjatë merkatos së verës dhe tentoi ta merrte duke u bazuar te relatat e tij me trajnerin Jose Mourinho, që arritën në pikën më të acaruar ndonjëherë.
Gjithsesi, Pogba e ka nisur shumë mirë këtë sezon me “djajtë”, por kjo nuk e largon Barcelonën nga synimi për ta marrë në verën e ardhshme, bazuar edhe te dëshira e francezit.
Sipas “The Mirror”, që nga ndeshja e ardhshme dhe deri në fund të sezonit, Pogba do të monitorohet në çdo takim nga vëzhguesit e Barcelona.
Drejtori i përgjithshëm Pep Segura dhe drejtori teknik Eric Abidal kanë marrë premtimin nga menaxheri Mino Raiola se 25-vjeçari do të shkojë në “Camp Nou”, nëse vendos të largohet nga “Old Trafford”. Kosto e transferimit pritet të jetë rreth 100 milionë euro.
