Mesditën e sotme, nga rezidenca kuqezi në Durrës kanë dalë në konferencë për shtyp dy futbollistë kuqezinj: Migjen Basha dhe Sindrit Guri. Thënë ndryshe, eksperienca dhe “gjaku i ri”, si për të thënë se duhet një emërues i përbashkët mes të dyjave për të evituar paraqitje si në miqësoret e fundit.
Duke nisur nga sfidat e radhës, ato zyrtare ((ndeshja me Izraelin në “Elbasan Arena”, më 7 shtator, dhe tjetra në fushën e Skocisë, më 10 shtator), për Ligën e Kombeve. Shqiptari i transferuar kësaj vere tek Aris i Selanikut ka nënvizuar në fjalën e tij: “U bë gati një vit që mungoj këtu, për disa arsye. Pata një dëmtim fillimisht, pastaj trajneri mendoi t’u jepte shansin lojtarëve të rinj. Jam shumë i lumtur që jam sërish pjesë e kombëtares dhe ndihem si herën e parë.
Nuk duhet me u ndal aq shumë te miqësoret e kaluara, ku jemi mundur, por të reagojmë menjëherë pas një disfate, sikurse bëmë pas humbjes me Luksemburgun. Në ndeshjet e fundit nuk ishte kombëtarja që jemi mësuar të shohim, ndaj duhet të reagojmë. Secili duhet të marrë përgjegjësitë e veta, sepse kemi pësuar dy disfata në miqësore.
Ka pasur lojtarë të rinj, trajneri ka eksperimentuar, ndaj nuk ka qenë kombëtarja e plotë. Jo vetëm eksperienca ime, por e të gjithëve vlen në kombëtare. Eshtë normale që do të ndryshojë kombëtarja. Në Europian ishim një gjeneratë, që po vjetërohet. Avash-avash duhet rinovim. Por, ndonjëherë nevojitet edhe eksperienca. T’i ndihmojmë lojtarët e rinj të përshtaten me ekipin. Një ditë do të vijë momenti që ta lëmë kombëtaren, sepse vitet kalojnë dhe kjo është diçka e natyrshme.
Shumë lojtarë i kemi pa ekipe, por këtë problem e kemi hasur përherë. Me rëndësi është që lojtarët të stërviten mirë dhe të jenë të gatshëm e të japin maksimumin për kombëtaren. Për ta marrë një rezultat të mirë kundër Izraelit, duhet të kemi edhe fat, edhe eksperiencë. Izraeli është një kundërshtar i fortë. Eliminatoret e kaluara, ndaj tij, në ndeshjen e parë kemi humbur në shtëpi, pastaj reaguam bukur në kthim.
Kalimi im tek Aris në Greqi ishte në funksion të ruajtjes së pozicionit në kombëtare, sa më shumë të jetë e mundur dhe sa të më lejojnë vitet. Duhet të jemi të qetë, pavarësisht situatës nga e cila vijmë. Disfata në ndeshjet e fundit duhet harruar, sepse tani nisim një cikël eliminatoresh zyrtare. Mavraj tek Aris? Shanse ka, por palët janë në kërkim të akordit financiar”.
