Ousmane Dembélé nuk mundi ta shijonte si duhet sezonin e tij të parë te Barcelona. Ai nuk u shfaq si udhëheqësi, golashënuesi, lojtari vendimtar në “Camp Nou”, sikurse kishte bërë te Borussia Dortmund. Sulmuesi francez ka provuar ta heqë shijen e keqe të gojës, që i la atij viti i parë te Barcelona, periudhë e cila u shenjua nga dy lëndime.
Kësaj here ai ka një start ëndrrash, sepse është një nga protagonistët e mëdhenj të grupit katalanas. Francezi po e rikuperon kohën e humbur dhe në kapitullin e rezultateve tashmë i ka 4 gola, sa në sezonin e tij të parë. Dembélé është në nxitim për të treguar që, nëse Barça ka paguar verën e vitit 2017 një shumë të caktuar prej 105 milionë eurosh për të, e cila mund të jetë 147 në varësi të variablave, nuk duhet të pendohet.
Faktet po i japin atij justifikim në këtë pikë. “11” azulgrana është titullar i padiskutueshëm për trajnerin Valverde (këtë sezon) dhe ai po përgjigjet me shfaqje bindëse. Dembele shënoi gol në finalen e Superkupës Spanjolle kundër Sevilla (2-1), zgjidhi ndeshjen e ngushtë në “José Zorrilla de Valladolid” me një gol të vetëm (0-1) dhe arriti kulmin të shtunën e kaluar në “Anoeta”, me një tjetër gol (1-2), që ishte me vlerë trepikëshe për katalanasit.
Dembélé është “specializuar” në ndeshjet e këtij sezoni. Dhe ja përse: tani për tani, të tria ndeshjet që Barça ka luajtur larg nga “Camp Nou” i ka zgjidhur me rezultat të ngushtë, në sajë të një goli nga francezi në pjesën e dytë, kur ekipi kishte më shumë nevojë. Në koloseumin e Barcelonës ai nuk ka shënuar gol kundër Alaves, në ndeshjen e parë të La Liga-s, por në pjesën e dytë, kundër Huesca. Goli i tij ishte i qetësisë, sepse vulosi fitoren 4-2 në pjesën e dytë. Lojtari francez ka besimin e plotë të trajnerit dhe atë të shokëve të tij.