Në klubin e Skënderbeut kanë nisur sërish ethet e vendimit të UEFA-s për dënimin 10-vjeçar, pasi drejtuesit shpresojnë që ta ulin më shumë. Korçarët vazhdojnë punën pavarësisht se e ardhmja ka shumë dritëhije dhe nuk i dihet se si do të shkojë. Ekipi i drejtuar nga trajneri Orges Shehi ka bërë mirë në kampionat, pasi ka fituar dy sfida dhe barazuar një tjetër.
Numri një i stolit është i kënaqur me rezultatet, pasi ka mposhtur Partizanin me rezultatin 1-0, Kastriotin 0-3 dhe ka barazuar me Laçin 1-1. Në fund e sheh veten në krye të klasifikimit. “Ujqërit” po mendojnë si e si të ngrejnë struktura të reja dhe të vazhdojnë të promovojnë të rinjtë. Ekipi i këtij sezoni është mbështetur te elementi i ri.
Faqja zyrtare e Skënderbeut në “Facebook” paralajmëroi ndërtimin e një akademie. Në një foto të publikuar nga zyra e shtypit shkruhet: “Diçka e madhe po vjen. Qëndroni në kontakt për detajet. K.F Skënderbeu Akademi”. Duket se klubi kampion do të ristrukturojë sektorin e të rinjëve dhe do t’i japin më shumë prioritet. Shpresojmë të mos jetë një shashkë tjetër, si shumë prej atyre që hedhin ekipet tona dhe pastaj fjalët mbesin në ajër.