Një barazim që nuk e kënaq sa duhet skuadrën e Kamzës dhe teknikun Klodian Duro. Ish-futbollisti i Kombëtares sonë deklaroi pas ndeshjes se ekipi i tij nuk e meritoi këtë rezultat pasi dha më tepër në fushë. Sipas tij Kamza duhet të shpërblehet me më shumë për lojën që bën në fushë.
“Akoma nuk po na i rikthen atë që kemi humbur. Sepse bëjmë një futboll të moderuar, europian. Por nuk po arrijmë të marrim më të mirën. Mendoj se Flamurtari i shpëtoi humbjes nga Kolici.
Një pikë që i jep një gjysmë besimi futbollistëve. Është një Kamëz që luan ashtu sic duam. Lëvizim në 4-4-2 pastaj në 4-2-3-1. Diferencat nuk ekzistojnë mes nesh dhe Flamurtarit, edhe pse është një skuadër e ndërtuar për të marrë titullin.
Humbja e Idrizajt na kapi të papërgatitur. Pësojmë një gol që nuk ishte rrjedhojë e lojës logjike. Duhet të vazhdonim lojën sepse nuk ke kohë të kthehesh pas. Është një pikë shumë e fortë kthese. Futbolli duhet të jetë më i drejtë. Sepse duhet të shpërblehesh për atë që jep një fushë”, deklaroi pas ndeshjes për “Supesport” Klodian Duro.
