Nuk kanë të sosur problemet tek Reali. Përveç rezultateve negative, një tjetër gjë që shqetëson madrilenët është mungesa e golit.”Los Blancos” nuk shënojnë prej tre ndeshjesh, e kjo gjë nuk ndodhte prej 11 vjetësh. Sigurisht, këtu ndjehet edhe mungesa e Cristiano Ronaldos, i transferuar tek Juventusi gjatë verës, por dhe merkatoja e vakët e skuadrës mbretërore. E pikërisht një nga blerjet e verës së këtij viti, Mariano Diaz, nuk po gjen hapësirat e duhura tek Reali. Julen Lopetegui i beson “verbërisht” Karim Benzema, megjithëse sulmuesi francez ka gjashtë ndeshje pa shënuar gol.
Sipas mediave spanjolle, Mariano kërkon hapësirat e tij, pas vitit të shkëlqyer që kaloi me Lyonin. E jo vetëm 25-vjeçari. Edhe tifozët e kampionëve të Europës kërkojnë me ngulm futbollistin nga Republika Domenikane, të jetë pjesë e formacionit titullar, pasi Benzema e ka shumë të vështirë të gjejë rrugën e rrjetës. E në fakt, kur Mariano u fut në fushë në humbjen me CSKA-në e Moskës, u duk se takimi ndryshoi shumë për madrilenët, me skuadrën që arriti të krijojë raste dhe volum loje. Ndoshta Lopetegui duhet të ndryshojë diçka tek ekipi i tij pas tre rezultateve negative, e ish-futbollisti i Lyon mund të bëhet shpëtimtari i skuadrës “merengues”.
