“Modriç? Sipas meje historia është disi e forcuar, është krijuar një sajesë. E njoh Lukën, e kam mik. Një futbollist që luan te Reali vështirë se kërkon të largohet diku tjetër. Unë e shoh në këtë mënyrë, ndoshta ka arsye të tjera…”.
Me këto fjalë ish-mbrojtësi i Juventusit, Igor Tudor, është shprehur lidhur me “telenovelën” e verës: transferimin e kroatit në Milano, i hedhur poshtë në fund nga “muri” i Realit. Kroati, ndër të tjera, i intervistuar nga “Radio Deejay”, ka folur edhe për momentin që po përjetojnë bashkëkombësit e tij tek Interi: “Janë të zotë, kanë një trajner të madh si Spaleti që ka punuar shumë me mentalitetin e Brozos, i cili cilësitë i ka pasur gjithmonë, por ishte më pak i disiplinuar në Kroaci. Perisiç është një sulmues krahu fantastik, të paktë krahasohen me të. Vrsaliko, pas Botërorit të shkëlqyer, do rritet akoma më shumë tek Interi”.
