Interi e ka nisur disi keq sezonin, por që me kalimin e kohës është rikthyer në nivele shumë të mira, duke arritur në 7 fitore radhazi, pasi të mërkurën në mbrëmje është ‘thyer’ nga Barcelona në “Camp Nou” me rezultatin 2-0.
Megjithatë drejtuesit e klubit e kanë kuptuar se për të bërë më mirë duhet një mesfushor dhe sikurse raporton “Corriere dello Sport”, zikaltërit janë në ndjekje të talentit Exequiel Palacios, i cili aktivizohet te River Plate.
Ky lojtar është vetëm 21 vjeç dhe cilësohet si një Modriç ‘i ri’, pasi me kroatin në merkaton e verës nuk u arrit një marrëveshje për t’u transferuar te 18 herë kampionët e Italisë. Gjithashtu një tjetër alternativë është edhe Frenkie De Jong, por që ky i fundit prej kohësh ndiqet nga Barcelona dhe mbetet për t’u parë nëse në këto ‘ujëra’ do të ketë diçka konkrete.
