Ekipi i Korabit barazoi ditën e sotme, 2-2 në transfertë ndaj Ilirisë. Në ndeshjen e luajtur në Fushë-Krujë, ekipet ndanë nga një pikë, por një episod i rrallë ndodhi në minutën e 88-të.
Ishte lojtari Murrja i dibranëve, i cili mori përsipër të realizonte një penallti të akorduar në favor të ekipit të tij, teksa ndeshja shënonte barazim 1-1. Murrja ia doli të shënonte me sukses me të majtën, por menjëherë sapo çoi topin në rrjetë, ndjeu dhimbje të mëdha në këmbën e djathtë.
Pasi shënoi 11-metërshin, ai i bëri menjëherë thirrje mjekëve të ekipit, që të shkonin drejt tij, pasi dukej që bëhej fjalë për një dëmtim të rëndë. Ai përfundoi në spital menjëherë pas sfidës, e cila për fatin e tij të keq, u barazua pak minuta më vonë, nga Gjokeka, për t’u mbyllur në barazim 2-2.
