Mbrojtësi i Interit, Milan Skriniar e konsideron Gonzalo Higuain një sulmues të madh, por zbuloi se nuk do të fokusohet vetëm tek ai kundër Milanit. Derbi i parë i Madonnina për këtë sezon zhvillohet të dielën në mbrëmje, me “Pipita” që ka shënuar në pesë ndeshjet e fundit radhazi. “Është e rëndësishme që ai të mos shënojë”, tha Skriniar për “ESPN”. “Por nuk është vetëm ai, Milani ka edhe sulmues të tjerë. Ai është një sulmues i madh, ndoshta një nga më të mirët në Itali, por nëse ai nuk shënon dhe dikush tjetër e bën, është e njëjta gjë. Kështu që ne duhet të përpiqemi të mos pranojmë gol, të shënojmë një ose dy dhe të fitojmë këtë ndeshje”, shtoi sllovaku.
“Unë nuk e kam humbur derbin e Milanos, derbi i parë ishte i mahnitshëm. Ne fituam 3-2, me një gol në minutën e 95’ nga Mauro Icardi. Ishte e mrekullueshme për ne, por edhe për tifozët tanë. Herën e dytë ishte një barazim 0-0. Ky është i treti në Serie A dhe shpresoj ta fitoj. Duhet të dëshmojmë se jemi më të mirët dhe ne duhet të japim gjithçka për ta bërë këtë. Ne jemi të bindur se jemi më të fortë se vitin e kaluar, por do të shohim në fushë”, theksoi Skriniar, që është kthyer në një nga lojtarët më të rëndësishëm të zikaltërve në repartin difensiv.
