Patrick Cutrone edhe njëherë ka qenë hero i Milanit.
Sulmuesi i talentuar italian është futur nga banka rezervë në ndeshjen ndaj Olympiacos dhe ka shënuar dy gola në fitoren 3-1 të Milanit.
20-vjeçari pas ndeshjes ka folur në konferencë për shtyp duke thënë se është i uritur gjithmonë për të shënuar.
“Gjithmonë jam i uritur për të shënuar gola, e kam pasur dhe vazhdoj ta kem këtë uri për gol”.
“Ishim në shtëpi dhe na duhej fitorja, për fat të mirë i morëm pikët që i donim”, tha italiani.
Sulmuesi qendror ka thënë se dëshira e tij është të luajë gjithmonë nga fillimi.
“Dua të luajë gjithmonë. Këtë gjë e kam thënë shpeshherë dhe vazhdoj të them. Nuk kam asgjë kundër asnjë lojtari, thjesht dua të luaj nga fillimi”, u shpreh talenti italian.
Për Cutronen dy golat ndaj Olympiacos ishin të parët në Ligën e Evropës për këtë edicion, pasi në ndeshjen ndaj Dudelange nuk u paraqit për shkak të lëndimit.
