Sot u luajtën tetë nga dhjetë ndeshjet e javës së 7-të të Kategorisë së Parë. Në grupin A ishin të gjithë në veprim, këtë të shtunë, ndërsa në grupin B pati dy “kufizime”. Kjo për shkak se Bylis-Pogradeci do të luhet nesër, ndërsa Elbasani-Lushnja të hënën.
Bie në sy ndalesa e parë në këtë kampionat e Vllaznisë. Kuqeblutë e drejtuar nga Hasan Lika nuk kanë shkuar dot më larg se barazimi pa gola në fushën e Shënkollit, një rezultat gjithsesi pozitiv, sepse nuk e cënon kreun e renditjes. Derbin e fqinjëve mes Korabit dhe Burrelit e kanë fituar bindshëm dibranët, me rezltatin 2-0, duke e prishur debutimin e Elvis Plorit në stolin matjan, në rikthimin e tij aty.
Besëlidhja ka dalë më tri pikë nga transferta me Vorën, duke iu afruar kreut të këtij grupi. Ka “ngecur” në barazimin pa gola Dinamo, në vizitën që i bëri Ilirisë në “Redi Maloku, megjithatë vendi i dytë mbetet sërish pronë e bluve kryeqytetas. Ama, tashmë ata ndiejnë “dihatjen” e afërt të lezhjanëve dhe shijakasve. Këta të fundit kanë triumfuar 2-1 në ndeshjen e sotme, duke “likuiduar” koplikasit në “Tofik Jashari”.
Sa i takon grupit B ka pasur “thatësirë” goli. Përjashtim ka bërë vetëm Mihani, që tri minuta nga fundi i lojës, përmes penalltisë, ka vendosur fatin e derbit të fqinjëve në Rrogozhinë. Një gol me peshë ky për verdhezinjtë, sepse i ngjit ata në krye, me 13 pikë, në pritje të sfidës së pogradecarëve me Bylisin, të hënën.
Më poshtë mund të njiheni me rezultatet e ndeshjeve, si dhe golashënuesit respektivë:
Kategoria e Parë, java e 7-të
Grupi A
Erzeni-Veleçiku 2-1
Golat: Goxha 10’, 40’ / Balaj 77’ (pen)
Shënkolli-Vllaznia 0-0
Vora-Besëlidhja 1-3
Golat: K.Nuri 61’ / A.Soumah 22’, E.Hoxha 65; T.Camara 83’
Iliria-Dinamo 0-0
Korabi-Burreli 2-0
Golat: Kraja 25’ (pen), 51’
Grupi B
Egnatia-Besa 0-1
Golat: Mihani 87’ (pen)
Turbina-Apolonia 0-0
Tomori-Oriku 0-0
Bylis-Pogradeci (nesër)
Elbasani-Lushnja (të hënën)
