Vera e nxehtë në Londër, gjë që është e pazakontë, e ka lënë sipërfaqen e fushës në stadiumin Wembley në një gjendje të tmerrshme para takimit të Ligës së Kampionëve mes Tottenhamit dhe Barcelonës.
Përtej problemeve në mbrojtje, Barcelona tani ka edhe një shqetësim tjetër para ndeshjes së saj të dytë në Grupin B të Ligës së Kampionëve kundër Tottenhamit në Londër – sipërfaqja e fushës në Wembley, raporton AS, përcjell Express.
Pas një vere të nxehtë në Londër, e cila nuk ndodh zakonisht, bari në Wembley është dëmtuar, me pjesë të konsiderueshme të tokës pa bari.
Skuadra e Ernesto Valverdes stërviti të martën mbrëma në tentim për t’u mësuar me fushën e dëmtuar, para ndeshjes të mërkurën mbrëma.
Zyrtarët e UEFA-s tashmë kanë marrë shënime për gjendjen e fushës në raportin e tyre për ndeshjen.
