Me Gjergji Muzakën jashtë për arsye dëmtimi, në kampin bardhekuq duket se formacioni do të ketë ndryshimet e nevojshme, sidomos edhe pas një tjetër mungese, siç pritet të jetë ajo e Krasniqit. Sulmuesi duket se nuk ia del dot për këtë ndeshje dhe fanella do t’i takojë sërish Oto Xhonit, që kundër Partizanit do të jetë në fushë nga minuta e parë.
I vetmi nga të lënduarit, i cili mund të jetë në dispozicion të Shehit në këtë ndeshje është kapiteni Marko Radas që duket se do të shtrëngojë “dhëmbët” për të qenë në fushë nga minuta e parë në këtë takim, duke udhëhequr ekipin nga fusha. Në portë Teqja dhe para tij do të jetë katërshja e zakonshme e formuar nga Vangjeli në të djathtë, Abazi në të majtë dhe dyshja Aliti-Radas në qendër të mbrojtjes.
Dita do të luajë në mesfushë në pozicionin e regjisorit, ndërsa Demte dhe Guezh do të jenë më të avancuar, me francezin që “do të bëjë Muzakën” në mesin e fushës. Në repartin e avancuar, Bregu dhe Gripshi do të mbështesin Oto Xhonin në majën e ofensivës bardhekuq.
