Antonio Rudiger do të fitojë një rritje page dhe zgjatje të kontratës me Chelsea, pas një starti mbresëlënës të sezonit nën drejtimin e trajnerit Maurizio Sarri. 25-vjeçari ka krijuar një partneritet të fortë me David Luiz në mbrojtjen e bluve këtë sezon dhe shënoi golin e parë (në barazimin 2-2, të javës së kaluar) ndaj Manchester United në “Stamford Bridge”.
Gjermanit ndërkombëtar i kanë mbetur më shumë se tri vite në kontratën e tij të tanishme, që kur u bashkua me londinezët nga Roma, vitin e kaluar. Megjithatë, “Goal.com” informon se Chelsea do ta shpërblejë dyfish formën e tij të mirë, duke ia rritur përfitimet aktuale prej 100.000 £ në javë dhe zgjatur kontratën.
Mbrojtësi do të përafrohet në këtë drejtim me disa nga lojtarët më të mëdhenj në klub. Rudiger ka luajtur në 11 nga 13 ndeshjet e Chelsea, deri tani, këtë sezon, ndërsa skuadra e Sarrit mbetet e pamposhtur në Premier League, duke shkuar e qetë në përplasjen e “Europa League” të së enjtes, me BATE Borisov.
Rudiger e ka përshkruar lumturinë e tij te Chelsea dhe ndien besimin që po i jep Sarri: “Ndihem shumë rehat te Chelsea dhe kam besimin e stafit teknik, tifozëve dhe të gjithë klubit. Këtë e provoj çdo ditë. Te Chelsea po i vëmë theksin posedimit të topit nën drejtimin e Sarrit, çka është shumë e rëndësishme për mua”.
