Nuk kanë mbetur edhe shumë orë, pritja po mbaron. Interi ka një provë force në Spanjë, pas rikthimit në Ligën e Kampionëve, konkretisht në “Camp Nou”, ku të besuarit e Spallettit do të sfidojnë Barcelonën. Duke qenë të dyja palët me pikë të barabarta, nga gjashtë të tillë pas dy ndeshjesh, katalanasit dhe zikaltrit luftojnë për vendin e parë në grupin B të Ligës së Kampionëve.
Interi mbërrin në këtë ndeshje me mbingarkesë, pasi arriti të kalojë me sukses derbin e Madoninës, por me Nainggolan të dëmtuar. I intervistuar nga “La Gazzetta dello Sport”, njëri prej protagonistëve të sigurtë në Barcelona-Inter, Ivan Rakitic, ka thënë shumë fjalë të rëndësishme për sulmuesin argjentinas:
“Ai ka kthyer Pippo Inzaghin në Seria A. Mauro është një nga ato sulmues, të cilët shfrytëzojnë çdo mundësi që i krijohet për të shënuar. Shikoni çfarë ka ndodhur me Milanin, në rastin e golit të tij. Nuk ka asgjë të rastësishme”.
Fakti që Icardi luan për herë të parë në Champions tingëllon i çuditshëm për kroatin e Barcelonës: “Kjo më duket si gënjeshtër. Ai është një prej sulmuesve më të mirë në botë. Ivan Perisic më ka thënë se është rritur shumë. E di se sa i rëndësishëm është për Interin. Ekipi dhe shokët e skuadrës kanë besim të patundur në të. Më duket një kapiten i vërtetë, ai që drejton nga rreshti i parë”.
Messi nuk do të jetë, gjë që komentohet kështu nga Rakitic: “Ne po flasim për lojtarin më të mirë në botë dhe ndoshta më të mirin në histori. Eshtë e vështirë për të luajtur pa të. Megjithatë, mungesa e tij është një mundësi për të tjerët”.
