Ardhja e Ze Marias në krye të Tiranës daton në periudhën kur skuadra kishte mësuar rënien në kategorinë inferiore për herë të parë. Fitimi i Kupës së Shqipërisë nën drejtimin e Mirel Josës u dha mundësinë kryeqytetasve që të merrnin pjesë në fazën e parë kualifikuese në Europa Ligë.
Braziliani zyrtarisht e nisi aventurën e tij me Makabi Tel Aviv në Europa Ligë dhe e përfundoi me disfatën ndaj Laçit në ndeshjen e vlefshme për javën e tetë të Kategorisë Superiore. “Panorama Sport” servir të gjitha statistikat e trajnerit brazilian në krye të 24 herë kampionëve të vendit. Në 46 ndeshje zyrtare që ka zhvilluar me bardheblutë, Ze Maria ka fituar Superkupën e Shqipërisë ndaj Kukësit dhe ka arritur të sigurojë ngjitjen në Kategorinë Superiore duke fituar trofeun e Kategorisë së Parë.
Trajneri brazilian ka arritur të koleksionojë 30 fitore, 7 barazime dhe 9 humbje, katër prej të cilave i ka regjistruar në Kategorinë Superiore. Një prej këtyre humbjeve është regjistruar menjëherë në rikthimin në elitë përballë Kamzës, një ndaj Kukësit, në përballjen derbi dhe e fundit ndaj kurbinasve, ndërkohë që bardheblutë kanë fituar me Luftëtarin dhe Kastriotin, si dhe kanë barazuar ndaj Teutës dhe Skënderbeut.
