Manchester City e ka mposhtur Southamptonin me rezultat të thellë 6-1 në kuadër të xhiros së 11-të në Premierligë.
Pjesa e parë filloi furishëm për djelmoshat e Pep Guardiolas, të cilët shënuan katër gola, ndërsa Southamptoni shënoi vetëm një gol nga pika e bardhë.
Në minutën e 6’ u shënua goli i parë që ishte autogol nga Wesley Hoedt, në minutën e 12’ ishte Kun Aguero që dyfishoi rezultatin, përsëri gjashtë minuta më vonë David Silva shënoi një gol të bukur për 3-0.
Në minutën e 30’ u akordua penallti, të cilën e realizoi në gol Danny Ings për skuadrën e Southamptonit.
Raheem Sterling në fund të pjesës së parë shënoi për 4-1.
Kurse në pjesën e dytë u shënuan edhe dy gola të tjerë, i dyti personal i Sterlingut, i cili shkëlqeu në këtë ndeshje, dhe në fund të takimit gjermani Leroy Sane vulosi fitoren me re rezultatin 6-1.
Me këtë fitore Man City merr vendin e parë në renditje me 29 pikë, kurse Southamptoni mbetet në vendin e 16-të me shtatë pikë.
Në javën e ardhshme në Premierligë, City e pret në shtëpi rivalin e qytetit Manchester Unitedin, ndërsa Southamptoni luan si vendas ndaj Watfordit.
