Barcelona ka mbërritur në Milano dhe është akomoduar në hotelin e zgjedhur prej saj, ku do të kalojë natën para ndeshjes me Interin, e vlefshme për fazën e grupeve të Ligës së Kampionëve. Nesër mbrëma, përplasja mes tyre në “San Siro” mund të jetë vendimtare në aspektin e kualifikimit drejt fazës tjetër të garës, asaj me eliminim direkt.
Dhe një nga yjet kryesorë të ekipit Blaugrana, Gerard Pique, e ka nisur me “zhurmë” këtë transfertë, duke “thyer kokën” në pasqyrën e autobusit. Ai po zbriste nga autobusi që i dërgoi katalanasit nga aeroporti i Milanos në hotel, me kufje në vesh dhe duke naviguar në celular, pa vëmendje, por u përplas me pasqyrën e mjetit.
Kuptohet, gjatësia e tij e ka ndëshkuar në këtë rast, sepse po të ishte një lojtar tjetër i Barcelonës, vështirë se do t’i arrinte koka deri te pasqyra e autobusit. Pasqyra nuk është thyer, ndërsa duket se dhimbja e kokës së Pique nuk ka qenë e fortë.
Të paktën, ai ka vijuar të mos i ndahet nga celularit, sikur asgjë të mos kishte ndodhur. Ndoshta e ka bërë këtë edhe duke “shtrënguar dhëmbët”, për të mos treguar asnjë dobësi në Milano, para sfidës me zikaltrit e Interit.
🤔 #Piqué, dove guardi?
😂 Arrivo col "botto" a Milano#SkySport pic.twitter.com/QM2VxNl857— Sky Sport (@SkySport) November 5, 2018
