Të shohësh një trajner në një klub tjetër, është gjithmonë diçka e pazakontë në futbollin e sotëm, çka mund të shkaktojë këndvështrime sensacionale, aq më shumë nëse trajneri në fjalë është Pep Guardiola.
Trajneri i Manchester City u pa të hynte sot në zyrat e Bayern Munich, ish-klubit të tij, para se të kalonte në “Etihad”. Guardiola mbërriti në “Säbener Strasse” me taksi dhe më pas u shoqërua për në selinë e klubit bavarez nga menaxheri i ekipit, Kathleen Krüger, përmes një parkingu nëntokësor.
Pamjet morën menjëherë shumë komente në rrjetet sociale, por shkatuan edhe reagime të shumta në Gjermani, sepse në këtë moment arsyeja e këtij takimi nuk dihet. Ka pasur nga ata, që kanë aluduar për një rikthim të fuqishëm të trajnerit katalanas në Gjermani, ose një vizite të lidhur me çështjet e merkatos. Megjithatë, gjithçka e këtij drejtimi mbetet në fushën e hipotezave.
Pep Guardiola e ka drejtuar Bayern Munich për tri sezone (2013-2016), duke fituar tre tituj të Bundesligës, një Superkupë Europiane dhe një Botëror për Klube. Ai aktualisht është i lidhur me Manchester City deri në vitin 2021, klub me të cilin fitoi titullin e parë të Premier League, sezonin e kaluar.
Këtij lajmi, duke pretenduar se është ekskluziv i tij, i ka bërë jehonë edhe gazetari i njohur sportiv gjerman, Torben Hoffmann, i cili është reporter i “Sky Sport News”.
Exklusiv!!!
Pep #Guardiola ist mit einem Taxi an der Säbener Straße vorgefahren und wurde von Teammanagerin Kathleen Krüger durch die Tiefgarage zur Geschäftsstelle gebracht! (Foto ging nicht besser, Pep war fix) @SkySportNewsHD @SkySportDE @FCBayern pic.twitter.com/grcCtnxapY— Torben Hoffmann (@Sky_Torben) November 14, 2018
