Real Madridi e ka rigjetur rrugën e fitores pas plot pesë ndeshjeve pa fitore në La Liga, pasi e mundi 2-0 Valladolidin të shtunën pasdite në një ndeshje që talenti i ri brazilian Junior Vinicius qe protagonist.
Real Madridi vinte nga tri humbje rresht dhe pesë ndeshje pa fitore në ligë, përfshirë turpërimin nga Barcelona që e dërgoi Julen Lopeteguin në shtëpi dhe e promovoi Santiago Solarin në stol përkohësisht.
Solari ia doli ta rikthejë Realin te fitorja pasi të përzgjedhurit e tij e mposhtën me shumë vështirësi Valladolidin, me Vinicius që u fut në 15 minutat e fundit të takimit dhe e ndihmoi skuadrën ta zhbllokojë rezultatin, raporton Gazeta Express.
Madridi nuk ia arriti të gjej golin e epërsisë në pjesën e parë, përkundër rasteve dhe dominimit, me mysafirët që nuk patën asnjë goditje në kornizën e portës.
Trajneri i përkohshëm i Madridit Solari vendosi t’ia besojë çerekun e fundit të takimit talentit të ri Junior Vinicus duke e sjellë në lojë në vend të Marcos Asensios.
Braziliani ia shpagoi besimin trajnerit të vet duke kryer pothuajse të gjithë punën te goli i epërsisë për Real Madridin.
Ai mori një top nga krahu i majtë dhe depërtoi në zonë dhe bëri një harkim nga i cili Kiko shënoi në portën e vet.
Rreth pesë minuta më vonë, Karim Benzema fitoi penallti, të cilën në gol e konvertoi kapiteni Sergio Ramos.
Tani, Reali ngjitet në pozitën e gjashtë me 17 pikë, katër më pak se lideri Barcelona, që ka një lojë më pak të zhvilluar.
