Pak rëndësi ka kjo, sigurisht, pasi te dragonjtë është kohë eksperimentesh dhe mes tyre do të jetë edhe emri i një futbollisti të ri dhe me prespektivë. Ndoshta anonim për disa, por jo në Angli. Fama e tij, deri tani, ka prekur dy pika: shpejtësinë dhe… zgjedhjen e bërë.
Por, le t’i marrim me rradhë. Cili është futbollisti më i shpejtë i Manchester Cityt? Ndihmë e vogël: as Sane dhe as Sterling. Jo, jo, as Mahrez! Atëherë? Emri që askush nuk pret: Rabbi Matondo.
Pasaporta e tij flet për datëlindjen në vitin 2000, pra vetëm 18 vjeç. Mundësia që të zgjidhte tre kombëtare – diçka e ngjashme me Januzin (Shqipëri, Kosovë, Belgjikë) – por që në fund mori një vendim që habiti këdo. Në Shqipëri, do të vijë pikërisht talenti i “Citizens”, nën urdhërat e Ryan Giggs, që e ka përzgjedhur dhe i ka dhënë shans. Pjesë e Uellsit, pasi refuzoi thirrjen e Anglisë dhe Republikës Demokratike të Kongos.
I lindur në Liverpool, i rritur në Cardiff (edhe futbollistikisht) dhe me një baba, Dada, kongolez dhe ish-futbollist edhe ai.
“Më në fund, mes të mëdhenjve”, ka shkruar futbollisti. Gjashtë paraqitje me U-21 dhe rasti i parë me kombëtaren e madhe, në Elbasan. E gjitha meritë e Giggs. “Ndihem i lumtur dhe krenar që mund të them jam uellsian”. Sulmues dhe me aftësi të jashtëzakonshme, sidomos në shpejtësi. Për ata që nuk e kanë parë, ose më saktë, për mbrojtësi kuqezi, ka një rrezik: 20 metrat e fundit, ku Matondo bëhet një rrufe.
Një tjetër xhevahir i sektorit të të rinjve të Premier League, që synon të fitojë vendin te Uellsi. Por, si u kuptua që sulmuesi 18 vjeçar ishte më i shpejti i Manchester Cityt. Një test i bërë në 20 metra, te skuadra e Akademisë. Matondo e fitoi bindshëm, por rezultati i tij ishte edhe më befasues, pasi duke bërë krahasimin me ekipin e Guardiolës, ia merrte kujtdo.
Largimi nga Cardiff nuk ishte i lehtë. Matondo konsiderohej si ndër më premtuesit që në kohët e Aaron Ramsey (flasim për fillimin e viteve ’90).
Do të ndizej derbi City-United për të, por në fund ia hodhën Citizens. Vizitoi Manchester Cityn dhe Akademinë, mbeti i mrekulluar.
Frymëzimi? Mbappe i Francës dhe PSG. Te vrapimi jemi njësoj, tani mbetet vetëm talenti!