Nuk pritej aspak në kampin verilindor, por ndodhi! Kukësi humbi 1-2 kundër Flamurtarit në një nga ndeshjet më emocionuese të Superiores deri në këto momente. Ekipi i trajnerit Armando Cungu vazhdoi me përformancën me dy fytyra, pasi në pjesën e parë pësoi dy gola, ndërsa në pjesën e dytë e dominoi kundërshtarin. Pozitat e teknikut shkodran lëkunden goxha pas kësaj humbjeje, pasi vjen pas atyre me Skënderbeun dhe Partizanin.
Numri një i klubit, Safet Gjici, nuk është aspak i lumtur me situatën, pasi ekipi i tij rrëshqiti sërish. Ai u kishte premtuar futbollistëve rrogat në rast se fitonin me vlonjatët, por humbja sjell të kundërtën. Kukësi do të ketë një tjetër duel force kundër Tiranës javën e ardhshme në “Selman Stërmasi”. Prej atyre sfidave që vendosin të ardhmen te nënkampionët e vendit, pasi në rast se nuk merret maksimumi, ose në rastin më të keq, në rast se ka një tjetër humbje, e ardhmja e Cungut vihet seriozisht në rrezik.
Kryepankina e verilindorëve nuk e ka patur as fatin me vete, pasi është përballur me shumë dëmtime lojtarësh. Besar Musolli si lideri i ekipit dhe mesfushës u dëmtua gjatë. Rrumbullaku ishte një tjetër goditje e madhe, pasi Zguro nuk po arrin ta zëvendësojë në 100 % të tij. Dzaria u dëmtua në sfidën kundër Laçit dhe nuk u grumbullua për Flamurtarin. Në sfidën kundër vlonjatëve pësoi një dëmtim dhe Donjet Shkodra. Terreni i fushës së stadiumit të Kamzës la goxha për të dëshiruar.
