Barcelona bëri dje një përmbysje drithëruese e fantastike në La Liga, duke mundur 3-2 Rayo Vallecano në 3 minutat e fundit, kur ishte në disavantazh 1-2. Ai që barazoi shifrat ishte Ousmane Dembele, i aktivizuar nga trajneri Ernesto Valverde në pjesën e dytë në vend të Rafinha. “Unë pres shumë nga Dembele, pasi mund të jetë i rëndësishëm për repartin sulmues. Ashtu sikurse edhe bëri në fitoren 3-2 ndaj Rayo”, u shpreh trajneri Valverde.
Skuadra “blaugrana” për një moment përjetoi makthin e humbjes së shtatorit në fushën e Leganes, gjë që konfirmohet edhe nga trajneri Valverde. “Për një moment fantazmat e “Butarque” ishin kudo në fushë, sidomos në pjesën e dytë. Por në fund bëmë diferencën, duke luajtur ndryshe dhe duke bërë diçka ndryshe nga ajo humbje. Rayo përmbysi avantazhin tonë dhe nuk ishte e lehtë të bëje të njëjtën gjë, por ia dolëm mbanë”, tha Valverde.