Ylli i Francës, Antoine Griezmann, këmbëngul se nuk është i fiksuar ta fitojë “Topin e Artë”, edhe pse pranon se është i etur për t’i vënë duart në trofeun e lakmuar. Griezmann është ndër pretendentët për ta fituar këtë çmim, pasi e ndihmoi Francën të fitojë Kupën e Botës në Rusi, si dhe Atletico Madrid të kishte lavdi në “Europa League”, në vitin 2018.
Duke folur pas fitores 1-0 të miqësores ndaj Uruguajit, të martën, 27-vjeçari ishte i qartë për dëshirën e tij: “Dua ta fitoj “Topin e Artë”, gjithashtu”. Por, kur u pyet nëse ndihej i fiksuar për këtë, ai u përgjigj:
“Jo, por ky është një çmim për Francën. Njerëzit nuk më pëlqejnë kur kërkojnë diçka për veten e tyre, individualisht, por jam krenar që do të jem atje si finalist dhe shpresoj ta fitoj trofeun. Sigurisht, ka lojtarë të tjerë, që mund ta fitojnë atë dhe e meritojnë, gjithashtu, kështu që le të shohim se çfarë do të ndodhë”.
Griezmann shënoi 4 gola në Kupën e Botës, ndërsa realizoi 29 gola në të gjitha garat për Atletico Madridin, në sezonin 2017-2018. Gara për “Topin e Artë” e përfshin me bashkatdhetarët e tij, Kylian Mbappe dhe Raphael Varane, ndërsa Luka Modric i Kroacisë është favoriti. Griezmann përfundoi i treti në garën për “Topin e Artë”, në vitin 2016, i cili u fitua nga Cristiano Ronaldo.
