Pas humbjes me “submission” ndaj Khabib Nurmagomedov në eventin e UFC-229, zhvilluar më 6 tetor, në Las Vegas, kampioni irlandez i arteve marciale mikse Conor McGregor duket se ka marrë një pushim me rrjetet sociale dhe jo vetëm. Përmes një postimi në faqen e tij zyrtare në “Instagram” ka qenë vetë irlandezi ai që ka pohuar se ka nevojë të dëgjojë më shumë veten e tij dhe se çfarë do të bëjë në të ardhmen.
Ndërkohë që edhe stafi i tij, përfshi trajnerin e tij besnik John Kavanagh, nuk ka asnjë informacion se çfarë është duke bërë aktualisht ish-kampioni i botës. Ka qenë vetë Kavanagh ai që ka pohuar se nuk flet me Conor prej dy muajsh, që pas humbjes ndaj Khabib, duke patur frikë se mos ky qëndrim i McGregor është një kritikë që ai ka karshi trajnerit.
“Kemi 2 muaj pa folur dhe nuk e di përse. Nuk kam biseduar dhe nuk e kam parë që pas duelit. Di që është duke promovuar markën e tij të whiskey nëpër botë, ku gjërat po i ecin mirë. Unë nuk e di se çfarë po mendon Conor, nuk mund të hyj në mendjen e tij. Unë po pres, ashtu si të gjithë ju për të mësuar hapin e radhës, duke kryqëzuar gishtat që të rikthehet sa më shpejt”, tha John Kavanagh.
