Mbase ky ka qenë momenti i përçarjes fatale mes Jose Mourinho-s dhe hierarkisë së Manchester United.
Pas dy viteve e gjysmë në Old Trafford, klubi ka shkarkuar trajnerin portugez pas startit të tmerrshëm në Premier League.
Teksa rezultatet e këqija në fushë kanë kontribuar për rënien e tij, Mourinho gjithashtu raportohet të ketë zemëruar drejtuesit e klubit gjatë ceremonisë përkujtimore të tragjedisë së Munich-ut.
Më 6 shkurt të vitit 2018 ishte 60-vjetori i tragjedisë më të madhe të historisë së klubit, ku avioni me lojtarët dhe stafin e Manchester United është rrëzuar duke marrë jetën e 23 personave, duke përfshirë tetë lojtarë të United dhe tre pjesëtarë të stafit.
Mourinho ishte pjesëmarrës në përkujtimoren e zhvilluar në Old Trafford dhe ishte veshur me atlete dhe bluze me kapuç të zeza nën kostumin e tij.
Sipas Times, veteranët e United janë tmerruar nga paraqitja e tij e zakonshme në një eveniment të tillë, gjithsesi askush nuk kishte këllqet për t’i thënë diçka.