Trajneri i Liverpoolit, Jurgen Klopp, ka bërë të ditur se nuk ka asnjë preferencë për rivalët në fazën e radhës të Ligës së Kampionëve dhe se nuk i intereson të hakmerret ndaj Real Madridit për finalen e sezonit të kaluar.
Goli i shënuar nga Mohamed Salah në pjesën e parë në ndeshjen kundër Napolit mbrëmë ishte i mjaftueshëm për t’ia siguruar anglezëve kualifikimin në fazën e eliminimit direkt të Ligës së Kampionëve.
Sezonin e kaluar, Liverpooli u ndesh me Real Madridin në finalen e Ligës së Kampionëve, ku u mposht me rezultat 3-1. Mirëpo, Klopp ka lënë të kuptohet se ai nuk është duke kërkuar t’i hakmerret madrilenëve për këtë finale.
Këto dy skuadra mund të ndeshen në fazën e 16 më të mirëve pasi që Real Madridi është kualifikuar si fitues i grupit, ndërsa Liverpooli është kualifikuar nga pozita e dytë.
“Gjëja e vetëm të cilën e di është se shumë tifozë do të donin të merrnin hakmarrje ndaj Paris Saint-Germainit [për humbjen e muajit të kaluar në Paris], por nuk mund të them asgjë për këtë, kaq di unë”, ka thënë Klopp.
“Ne duhet ta presim shortin, pa asnjë problem. Deri para ndeshjes sonte, nuk isha i sigurt nëse do të kualifikoheshim, por tani e kemi siguruar këtë. Si mund të ulem këtu dhe ta kërkoj ndonjë skuadër?”.
“Nuk më intereson. Jemi të dytët në grup, do ta kemi një kundërshtar të fuqishëm dhe të mrekullueshëm, kjo është e gjitha”.
