Liverpool do të jetë i hapur për të blerë lojtarë të rinj në merkaton e janarit nëse do t’i duhet përforcime në luftën për titullin kampion, konfirmon trajneri Jurgen Klopp të hënën.
Skuadra e Klopp ka disa të dëmtuar për momentin, sidomos në mbrojtje, me Matip dhe Gomez që do të mungojnë deri nga mesi i janarit.
“Jam shumë i lumtur me lojtarët në dispozicion, por nuk i dihet. Prandaj e mbaj gjithmonë derën hapur për blerje të reja. Nëse ndodh diçka, duhet të jemi të përgatitur,” shprehet Klopp në konferencën për shtyp në prag të ndeshjes së radhës me Newcastle.
“Do të futemi në merkato vetëm nëse ndodh diçka dramatike, përndryshe jemi mirë kështu siç jemi.”
Liverpool do të ndeshet ndaj skuadrës së ish-trajnerit Rafa Benitez dhe Klopp nxit tifozët e Kuqë të tregojnë respekt për spanjollin.
“Mendoj se tifozët e klubit nuk e kanë harruar punën e mrekullueshme që ka bërë ai këtu.
“Rafa është një trajner me eksperiencë dhe për momentin skuadra e tij është në formë të mirë. Është gjithmonë e vështirë të luash kundër tyre”.
