Mbrojtësi i Kombëtares, Mërgim Mavraj ka qenë i pafat në sfidën e sotme ndaj Atromitos të vlefshme për javën e 13-të të Superligës greke.
Skuadra e tij u mposht me rezultatin 2-0, teksa në minutën e 56-të, shqiptari kishte një shans të artë për të barazuar rezultatin. 32-vjeçarit iu besua një 11-metërshi i fituar nga vetë ai, por nuk arriti ta kthente në gol. Ka qenë portieri kundërshtar që me pritjen e tij, i ka mohuar golin futbollistit të Kombëtares. Ky moment i ka kushtuar shtrenjtë skuadrës verdhezi.
Në formacionin titullar në sfidën e sotme ka qenë edhe mesfushori Migjen Basha, i cili u ndëshkua me kartonin e verdhë në minutën e 38-të. Me humbjen e sotme, Arisi është larguar nga zona Champions, teksa diferenca nga vendi i dytë ka shkuar në -9.
