Trajneri i Barcelonës, Ernesto Valverde, ishte mjaft i kënaqur që largohej nga Levante me një fitore të thellë 5-0, duke pasur parasysh eksperiencën e tij në të njëjtën lojë të sezonit të kaluar. Lionel Messi shënoi një “hat-trick” dhe asistoi golat e Luis Suarez e Gerard Pique, të dielën.
Në maj të këtij viti, Barça u mund 5-4 nga Levante dhe i pa shpresat e saj për ta mbyllur sezonin pa asnjë humbje të “hidheshin në erë” në një ndeshje të vetme. Dhe Valverde ishte i uritur për njëfarë hakmarrjeje ndaj Levantes.
“Jam i lumtur, sepse kemi pësuar pesë gola sezonin e kaluar këtu. Ky kundërshtar na shkaktoi humbjen e vetme të një sezoni të tërë. Kjo kishte ndodhur disa muaj më parë, –tha ai në një konferencë shtypi. – Levante ka zhvilluar një sezon të madh deri më tani, çka deshi ta tregonte edhe kundër nesh. Fituam bindshëm dhe po largohemi nga këtu mjaft të kënaqur”.
Paraqitja e Messit u lartësua nga trajneri Valverde, i cili u përpoq të gjente fjalët e duhura për 31-vjeçarin. Ylli argjentinas u bërë lojtari i parë në pesë ligat më të mira europiane, këtë sezon, që arrin shifra të dyfishta për golat dhe asistet.
“Nuk e di se si ta etiketoj atë. Nuk e di se si t’i përgjigjem pyetjes më të përsëritur karshi meje, – tha ai. – Leo është ai që na bën të luajmë, që na siguron gola të mahnitshëm… Ne vetëm duhet të lumturohemi që e kemi atë”.